هديتي لك من صميم الخوافي
للشاعر حمد خليفة أبو شهاب
1
هــديــتــي لك مــن صــمـيـم الخـوافـي
أبــيـات شِـعـرٍ كـالجـواهـر مـنـاثـيـرْ
2
تــزفّهــا لك يـا الزعـيـم السـنـافـي
خــودٍ تـفـوق الفـاتـنـات الغـنـاديـر
3
اخــتـرْتـهـا لك مـن عـيـون القـوافـي
روايـــعٍ مـــذخــورةٍ لك عــن الغــيــر
4
عـن نـفْـسـهـا تـنـبـيـك مـن قلب صافي
صفْو الغدير العذْب باحلى التعابير
5
مــن الكَـرى أشـهـى عـلى جـفْـن غـافـي
والَذّ مــن در البــكــار المـصـاغـيـر
6
هــي راس مـال اللي لك مْـديـم وافـي
(مـخـلص على عهْد الولا دون تغيير)
7
يــا زايــد اللي كــلّمــا هَــلّ لافــي
عـيـدك تـرفـرف فـي ذراه البـنـاديـر
8
تـــرفّ فـــي جـــوٍّ مـــن الودّ صـــافـــي
عــلى الوادي والمــدن والمـحـاضـيـر
9
نـبْـت الوفـا مـن كـف يـمـنـاك ضـافـي
يـا ظـل شـعـبـك عـن سـمـوم الهواجير
10
يـا مـا شـربْـت مـن الكـدر والصوافي
ويـا مـا حـمـلْت من المتاعب مكاثير
11
تــســهــر لشـعـبـك والخـوالي غـوافـي
تـسـفـي عـليـهـم سـافـيـات الدعـاثير
12
وحَّدْتــنــا بــعْـد الشـقـا والتـجـافـي
واسـتـبـشَـرَت بـالخـير منْك الجماهير
13
وابــتــدلِتْ عــقـب السـنـيـن العـجـافِ
ديـارنـا بـاليـسْـر بـعـد المـعـاسـير
14
حـــوَّلْت دَوٍّ مـــمـــحِـــل الخــد عــافــي
روضٍ تــغــرّد فــي ربــاه العـصـافـيـر
15
وتــمــيـس فـيـه المـتـرفـات العـفـافِ
النــاعــمـات اللابـسـات المـخـاويـر
16
مــن كـل حـسْـنـا شـوفـهـا لي يـشـافـي
قـلبٍ طـعـيـن المـرهـفـات البـواتـيـر
17
مـا عـاد تـعـبـيـري بـالاشـعار كافي
أحـسّ رغـم الجـهْـد فـي الوصـف تقصير
18
لكــنّ تــقــصـيـر الشِـعـر مـا يـنـافـي
مـا فـي ضـمـيـري مـن مـحـبـه وتـقدير
19
ولك التـهـانـي مـن صـمـيـم الخـوافي
يـا قـايـد السـادات يا زايد الخير
تعليقات القراء 0